Presidenti i Real Madrid, Florentino Perez, ka bërë të ditur se do të mbahen zgjedhje në klub dhe se ai do të kandidojë sërish për postin e presidentit.

“Nuk do të jap dorëheqje”, ka deklaruar Perez gjatë një konference për media të martën, në fund të një sezoni zhgënjyes për gjigantin spanjoll.

Sezoni 2025/26 pritet të mbyllet pa trofe për madrilenët. Barcelona fitoi 2:0 në “El Clasico” ndaj Real Madrid në “Camp Nou”, duke siguruar titullin e dytë radhazi në LaLiga tri javë para fundit të kampionatit.

Po ashtu, Real Madrid është eliminuar në çerekfinale të Champions League nga Bayern Munich.

Sipas raportimeve, trajneri aktual Alvaro Arbeloa, i cili e kishte marrë drejtimin e ekipit në janar pas largimit të Xabi Alonso, nuk pritet të vazhdojë sezonin e ardhshëm.

Në mediat spanjolle është përmendur edhe mundësia e rikthimit të ish-trajnerit Jose Mourinho në stolin e klubit madrilen.

Ndërkohë, sezoni është shoqëruar edhe me tensione brenda skuadrës. Tifozët kanë protestuar ndaj yllit francez Kylian Mbappe për atë që e konsiderojnë mungesë përkushtimi, ndërsa mediat kanë raportuar për përplasje në stërvitje mes lojtarëve. Një prej incidenteve thuhet se ka përfunduar me mesfushorin Fede Valverde në spital./rtk