Një ngjarje tragjike ka ndodhur në aeroportin e Denver në Shtetet e Bashkuara të Amerikës, ku një avion i Frontier Airlines ka vrarë një person që ndodhej në pistë, pasi kishte kapërcyer gardhin rrethues të sigurisë, moment i cili është, regjistruar në audio të kontrollit të trafikut ajror

“Ne sapo goditëm dikë”, i thotë piloti kullës së kontrollit pasi ndërpreu ngritjen e Fluturimit 4345. “Kemi zjarr në motor.”, raporton BBC.

Tym mund të shihej në kabinën e Airbus A321, por Departamenti i Zjarrfikësve të Denverit e shuajti shpejt zjarrin. Të gjithë 224 pasagjerët në bord u evakuuan me rrëshqitëse emergjente fryrëse si masë paraprake, tha Frontier.

“Jemi thellësisht të trishtuar nga kjo ngjarje”, shtoi kompania ajrore.

Dymbëdhjetë pasagjerë në bord raportuan lëndime të lehta nga incidenti, tha aeroporti.

Pesë nga pasagjerët e lënduar u dërguan në spitale aty pranë, sipas autoriteteve të aeroportit. Gjendja e tyre nuk ishte e qartë.

Fluturimi i Frontier Airlines po nisej drejt Aeroportit Ndërkombëtar të Los Angelesit rreth orës 23:00 sipas kohës lokale (06:00 BST), kur goditi personin, thanë autoritetet.

Personi i paidentifikuar kishte kapërcyer gardhin rrethues të sigurisë dy minuta para përplasjes, tha kompania ajrore.

Një kontrollor i trafikut ajror sapo i kishte thënë pilotit të Frontier se pista ishte e lirë për ngritje dhe i kishte uruar natë të mirë.

Pas një pauze të shkurtër, piloti kontaktoi sërish kullën e kontrollit, sipas audios së trafikut ajror.

“Po ndalemi në pistë”, i tha piloti kullës, duke shtuar se avioni sapo kishte goditur dikë.

“Ishte një person që po ecte nëpër pistë”, tha piloti.

“Kemi 231 persona në bord”, shtoi ai, përfshirë shtatë anëtarë të ekuipazhit.

Avioni po lëvizte me “shpejtësi të lartë” në atë moment, tha Sekretari i Transportit, Sean Duffy.

“Mbrëmë vonë, një person depërtoi në sigurinë e Aeroportit Ndërkombëtar të Denverit, kapërceu qëllimisht gardhin rrethues dhe vrapoi në pistë”, tha Duffy në një deklaratë.

“Askush nuk duhet KURRË të hyjë pa leje në një aeroport”, shtoi ai.

Aeroplanët komercialë zakonisht ngrihen me shpejtësi mes 150 dhe 180 milje në orë (240–290 km/h).

Personi që hyri në pistë nuk besohet të ketë qenë punonjës i aeroportit, tha Aeroporti Ndërkombëtar i Denverit (DIA).

“Aeroporti ka inspektuar gardhin rrethues dhe ka konstatuar se ai ishte i paprekur”, tha DIA në një deklaratë.

Tym në kabinë mund të shihet në fotografi dhe video të shpërndara nga një prej pasagjerëve.

Pasagjeri Jose Cervantes i tha një filiali të CBS, partnerit amerikan të BBC-së, se dëgjoi një goditje dhe më pas “pashë krahun e djathtë në flakë, sikur po shpërthente”.

“Mendova se do të digjesha për së gjalli”, shtoi ai. “Kur pashë zjarrin dhe tymin, mendova se do të digjesha.”

Pas evakuimit të avionit, pasagjerët u transportuan me autobusë drejt terminalit ndërsa ekipet emergjente ndërhynin në vendngjarje, tha DIA.

Shumica e pasagjerëve më pas u larguan nga Denveri me një fluturim tjetër të Frontier, tha aeroporti.

Pista u mbyll ndërsa Administrata Federale e Aviacionit dhe Bordi Kombëtar i Sigurisë në Transport nisën hetimet.

“Jemi jashtëzakonisht të trishtuar nga ky incident dhe shprehim ngushëllimet tona për të gjithë të përfshirët”, tha DIA.