Ndeshja e parë gjysmëfinale e Ligës së Kampionëve mes Atletico Madridit dhe Arsenalit u mbyll me rezultatin 1:1. 

Të dyja golat u shënuan nga penalltia, ndërsa “topçinjve” nuk iu dha me VAR një penallti në pjesën e dytë, ndonëse ajo u sinjalizua fillimisht nga gjyqtari kryesor i ndeshjes. 

Pas ndeshjes pati shumë kritika pse penalltia e Eberechi Ezes nuk u sinjalizua pas rishikimit të situatës nga gjyqtari holandez, Danny Makkelie. 

Zëvendësuesi Eze u pengua në zonë nga David Hancko në minutën e 78-të.
Në një deklaratë të shkurtër, UEFA e ka shpjeguar vendimin e gjyqtarit Makkelie, shkruan “Sky Sports” të enjten. 

“Lojtari i Atleticos me numër 17, nuk ka shkaktuar faull në kundërshtarin”, ka thënë UEFA. 

Konfederata evropiane e futbollit nuk ka dhënë sqarime tjera për këtë vendim. 

Declan Rice i Arsenalit ka thënë se gjyqtari e ktheu vendimin pasi ra nën ndikimin e 70 mijë tifozëve të Atleticos.

Ndeshja e kthimit luhet të martën e ardhshme.