Një sulm i dhunshëm është regjistruar në Tokio, ku një burrë i armatosur me çekiç plagosi pesë persona, përfshirë një adoleshent, dhe më pas u largua nga vendngjarja, raportojnë mediat japoneze.

Sipas burimeve mediatike, i dyshuari, rreth 44 vjeç, sulmoi dy adoleshentë të mërkurën pranë banesës së tij në zonën Fusa Township, një periferi e kryeqytetit japonez. Dyshohet se konflikti nisi pasi të rinjtë po flisnin me zë të lartë.

Njëri prej viktimave, një student adoleshent, ka pësuar dëmtime të rënda në fytyrë, ndërsa një tjetër është plagosur lehtë në shpatull, sipas raportimeve të NHK dhe agjencisë Kyodo News.

Pas mbërritjes së policisë në vendngjarje, i dyshuari spërkati tre efektivë me një substancë ende të paidentifikuar dhe arriti të largohej. Autoritetet nuk kanë dhënë ende detaje mbi gjendjen shëndetësore të të plagosurve.

Policia metropolitane nuk ka bërë komente zyrtare lidhur me incidentin, ndërsa hetimet për kapjen e autorit vijojnë.

Ngjarje të tilla mbeten të rralla në Japoni, një vend i njohur për nivele shumë të ulëta të kriminalitetit dhe për ligje të rrepta mbi armëmbajtjen.