Bashkëshortja e Rexhep Selimit, Shqipe Selimi, ka dhënë një deklaratë para fillimit të seancës së radhës në Dhomat e Specializuara të Kosovës në Hagë, duke e vlerësuar këtë fazë të procesit gjyqësor si jashtëzakonisht të rëndësishme.

Ajo theksoi se ky proces ka rëndësi të madhe, jo vetëm për katër ish-krerët e Ushtrisë Çlirimtare të Kosovës, por edhe për të gjithë qytetarët, duke ripërsëritur se lufta e UÇK-së ka qenë e drejtë dhe në përputhje me të drejtën e popullit për liri.

“Është një proces shumë i rëndësishëm, jo vetëm për katërshen e UÇK-së, por për të gjithë ne. Dihet që lufta e UÇK-së ka qenë e drejtë dhe në të drejtën e popullit. Të gjithë bashkë jemi këtu që t’i dalim në mbështetje katërshes së UÇK-së dhe trupi gjykues të jetë në të drejtën e tyre, në të drejtën tonë”, tha ajo para mediave.

Procesi ndaj ish-drejtuesve të UÇK-së ka hyrë në fazën përmbyllëse, ku pritet që të akuzuarit të japin deklaratat e fundit në mbrojtje para trupit gjykues, përpara shpalljes së vendimit përfundimtar.