Në legjislaturën e dhjetë të Kuvendit të Kosovës, institucioni më i lartë legjislativ do ta drejtohet nga një grua, ndërsa përkrah saj do të jenë edhe dy gra në pozitat e nënkryetareve të Kuvendit.

Albulena Haxhiu është zgjedhur kryetare e Kuvendit të Kosovës për legjislaturën e dhjetë. Ajo mori 66 vota për, 44 ishin kundër, ndërsa 8 deputetë abstenuan.

Ndërkaq, Kuvendi zgjodhi edhe nënkryetarët me votim në pako. Me 104 vota pro, 3 kundër dhe 6 abstenime, 115 deputetët miratuan përbërjen e re të nënkryetarëve.

Nga radhët e Partisë Demokratike të Kosovës, Vlora Çitaku u zgjodh nënkryetare e Kuvendit. Po ashtu, Emilija Rexhepi mori postin e nënkryetares nga radhët e komuniteteve joshumicë joserbe.

Nënkryetarë të tjerë të Kuvendit u zgjodhën edhe Ardian Gola nga Lëvizja Vetëvendosje, Kujtim Shala nga Lidhja Demokratike e Kosovës dhe Sllavko Simiq nga Lista Serbe.

Paraprakisht, subjektet politike ishin dakorduar për votimin në pako në takimin e mbajtur me kryetarin e Kuvendit të legjislaturës së kaluar, Dimal Bashën.