Irani do të sulmojë bazat ushtarake amerikane në Lindjen e Mesme nëse sulmohet nga Shtetet e Bashkuara, forcat e të cilave kohët e fundit kanë rritur praninë e tyre në rajon, tha të shtunën Ministri i Jashtëm iranian Abbas Araghchi.

Ai theksoi se një përgjigje e tillë do të synonte ekskluzivisht objektivat amerikane dhe nuk duhet të interpretohet si një sulm ndaj vendeve pritëse ku ndodhen bazat.

Deklarata e e tij një ditë pasi Teherani dhe Uashingtoni njoftuan vazhdimin e negociatave indirekte mbi programin bërthamor të Iranit, të cilat të dyja palët i vlerësuan si pozitive, raporton Reuters.

Duke folur për Al Jazeera, Araghchi tha se data e raundit të ardhshëm të negociatave nuk është specifikuar ende, por presidenti i SHBA-së, Donald Trump, tha se bisedimet mund të vazhdojnë që javën e ardhshme.

“Si ne ashtu edhe Washingtoni besojmë se negociatat duhet të zhvillohen së shpejti”, tha ai.

Trump më parë ka paralajmëruar me një sulm të mundshëm ndaj Iranit, paralelisht me forcimin e Marinës Amerikane në rajon, duke kërkuar që Teherani të heqë dorë nga pasurimi i uraniumit, i cili shihet si një rrugë e mundshme drejt zhvillimit të armëve bërthamore, dhe të ndalojë zhvillimin e raketave balistike dhe mbështetjen për grupet e armatosura në të gjithë Lindjen e Mesme. Autoritetet iraniane kanë hedhur poshtë prej kohësh akuzat se kanë ndërmend të zhvillojnë armë bërthamore.

Edhe pse si Irani ashtu edhe Shtetet e Bashkuara kanë treguar gatishmëri për të ringjallur diplomacinë në lidhje me mosmarrëveshjen e gjatë bërthamore, Araghchi hodhi poshtë mundësinë e zgjerimit të bisedimeve në çështje të tjera.

“Çdo dialog kërkon përmbajtje nga kërcënimet dhe presionet. Ne po flasim ekskluzivisht për programin tonë bërthamor me Uashingtonin. Ne nuk po negociojmë me SHBA-në për asnjë çështje tjetër”, tha ai.

Irani këmbëngul në njohjen e të drejtës së tij për të pasuruar uranium dhe paralajmëron se përfshirja e programit të raketave në negociata do ta bënte vendin të prekshëm ndaj sulmeve të mundshme izraelite.