Kërcënimi më i fundit i Donald Trump për tarifa, në ndjekje të synimit të tij për të marrë Groenlandën, është një makth politik për udhëheqësit evropianë, por mund të krijojë edhe një dhimbje koke të rëndë ekonomike.

Siç ka theksuar vazhdimisht Fondi Monetar Ndërkombëtar (FMN) që nga fillimi i luftës tregtare të Trump-it vitin e kaluar, pavarësisht nivelit përfundimtar të tarifave, pasiguria ka koston e vet.

Dhe siç e shprehu drejtoresha menaxhuese e FMN-së, Kristalina Georgieva, në tetor, në epokën e Trump-it “pasiguria është normaliteti i ri”.

Bizneset priren të hezitojnë të bëjnë investime të reja kur nuk janë të sigurta se si do të duket peizazhi i politikave, siç e mësoi Mbretëria e Bashkuar me kosto gjatë viteve të gjata të grindjeve për Brexit-in pas referendumit të vitit 2016.

Ky kërcënim i fundit vjen pikërisht kur bizneset në Mbretërinë e Bashkuar dhe në BE besuan se mund të planifikonin me siguri, pas marrëveshjeve tregtare të shumëpërfolura me SHBA-të që u nënshkruan me ceremoni verën e kaluar.

Nëse Trump vazhdon me tarifat 10% në shkurt, duke u rritur në 25% më 1 qershor, kjo do të hedhë më shumë “rërë në rrotat e ekonomisë” në një moment të vështirë, me Francën të zhytur në krizë buxhetore dhe Gjermaninë që shpreson për një rimëkëmbje ekonomike pas stanjacionit në vitin 2025.

Për kancelaren britanike, Rachel Reeves, koha nuk mund të ishte më e keqe, pikërisht kur ajo kishte arsye të shpresonte për një rritje modeste pas një viti të vështirë.

Ironikisht, një nga rreziqet më të mëdha të kapriços së fundit të Trump-it gjendet brenda vendit, me kërcënimin e rritjes së çmimeve.

Tarifat e vendosura gjatë vitit të kaluar janë më të lartat që nga Lufta e Dytë Botërore, megjithëse më të ulëta se sa kishte kërcënuar fillimisht Trump. Deri tani, inflacioni ka lëvizur pak, edhe pse rritja e kostos së importeve të rëndësishme ushqimore, nga kafeja te avokadot, e shtyu Trump-in të ulte tarifat mbi to në nëntor.

Disa analistë kanë paralajmëruar prej kohësh për një rritje të mëtejshme të çmimeve, pasi stoqet para-tarifore të pjesëve dhe produkteve të importuara po shterojnë, dhe kompanitë amerikane kanë më pak hapësirë për të përthithur kosto shtesë.

Inflacioni më i lartë do të frenonte ulje të mëtejshme të normave të interesit nga Rezerva Federale, duke minuar një nga synimet kryesore ekonomike të Trump-it, për të cilin ai ka ushtruar presion dhe ka këshilluar me ngulm kryetarin e Fed, Jerome Powell, për muaj me radhë.

Shkrim nga The Guardian