Osmani për vërshimet: Kam komunikuar me kryetarët e komunave, situata kërkon kujdes maksimal – FSK-ja në gatishmëri

19:39 | 6 Janar 2026
H.E

Presidentja e vendit, Vjosa Osmani u ka bërë thirrje qytetarëve për kujdes pas situatës me vërshimet, si dhe ka kërkuar zbatimin e udhëzimeve nga institucionet përgjegjëse.

Ajo ka shprehur mirënjohje për institucionet dhe qytetarët për reagimin dhe solidaritetin e treguar.

“Agjencia për Menaxhimin e Emergjencave po punon pareshtur bashkë me organet e rendit. Falënderoj edhe Forcën e Sigurisë së Kosovës për gatishmërinë e plotë për ofrimin e mbështetjes së menjëhershme, duke vënë në dispozicion kapacitetet e saj njerëzore dhe logjistike, nëse paraqitet nevoja”, ka shkruar Osmani në Facebook.

Më tej, presidentja ka njoftuar se ka komunikuar me kryetarët e komunave të prekura, duke thënë se ata po udhëheqin menaxhimin e situatës në terren, në koordinim të ngushtë dhe me mbështetjen e institucioneve qendrore.