Kryeministri në detyrë i Kosovës, Albin Kurti, ka vizituar Kampin e Njësive Speciale në Vrellë, ku në prani të tij është realizuar testimi i mundësive të mbrojtjes ajrore të Policisë së Kosovës.

Kurti ka ndarë pamje nga ky testim në llogarinë e tij në Facebook, duke publikuar një video nga demonstrimi i kapaciteteve të mbrojtjes ajrore përmes njësive të dronëve dhe antidronëve, shkruan Arbresh.info.

Ai ka theksuar se para dy vitesh, në kuadër të Policisë së Kosovës, është themeluar Drejtoria e Mbrojtjes Ajrore, ku njësitë dron dhe antidron përbëjnë komponentë kyç të saj.

“Para dy vitesh, në kuadër të Policisë së Kosovës, kemi themeluar Drejtorinë e Mbrojtjes Ajrore, me njësitë dron dhe antidron si komponentë kyç. Në Kampin e Njësive Speciale në Vrellë u realizua testimi i mundësive të mbrojtjes ajrore, duke u bazuar në kapacitetet e brendshme të Policisë së Kosovës. Falënderoj zyrtarët për angazhimin dhe profesionalizmin e treguar. Mbështetja jonë për ngritjen dhe fuqizimin e këtyre pajisjeve dhe mënyrave do të jetë e vazhdueshme”, ka shkruar Kurti./Arbresh.info