FIFA po shqyrton mundësinë e një ndryshimi të madh në rregulloren e futbollit, i cili mund të testohet që në Kupën e Botës 2026. Sipas raporteve, figura të rëndësishme brenda organizatës po shtyjnë që sistemi VAR të marrë kompetenca shtesë, përfshirë ndërhyrjen në vendimet për goditjet nga këndi.

Botërori i vitit 2026, që do të mbahet nga 11 qershori deri më 19 korrik në SHBA, Kanada dhe Meksikë, do të jetë turneu i parë me 48 kombëtare pjesëmarrëse. Përveç zgjerimit të numrit të ekipeve, FIFA po konsideron edhe risi të tjera të rëndësishme teknologjike dhe rregullatore.

Sipas “The Times”, udhëheqës brenda FIFA-s po mbështesin idenë që VAR-i të ketë të drejtë të korrigjojë rastet kur një goditje nga këndi është dhënë gabimisht. Kjo do të lejonte përdorimin e kompetencave të reja në mënyrë të përkohshme ose eksperimentale gjatë turneut.

Argumenti kryesor është se gabime të tilla mund të ndikojnë drejtpërdrejt në rezultatet e ndeshjeve, sidomos në sfida vendimtare siç është finalja e Kupës së Botës. Për këtë arsye, zyrtarët kërkojnë që çdo vendim të jetë sa më i saktë.

Përveç kësaj, VAR-i mund të marrë autorizimin të rishikojë edhe kartonët e dytë të verdhë, për të siguruar që çdo përjashtim të jetë i drejtë.

Nëse propozimet miratohen, ndryshimet do të hyjnë në fuqi më 1 qershor – vetëm pak ditë para nisjes së Botërorit.

Megjithatë, anëtarët e IFAB-it (International Football Association Board) kërkojnë garanci se zgjerimi i rolit të VAR-it nuk do të shkaktojë vonesa të panevojshme në lojë. Çdo vendim shtesë duhet të merret brenda disa sekondave nga zyrtarët e videos.

IFAB-i përbëhet nga katër federatat britanike, secila me nga një votë, dhe nga FIFA me katër vota. Çdo ndryshim kërkon të paktën gjashtë nga tetë votat për t’u miratuar./Arbresh.info