Ministrja për Evropë dhe Punë të Jashtme e Shqipërisë, Elisa Spiropali është takuar në Bruksel me zëvendëspresidenten e Komisionit Evropian, Kaja Kallas.

Në një postim në rrjetet sociale, Spiropali shprehet se me shumë kënaqësi ka zhvilluar këtë takim, duke theksuar angazhimin e mëtejshëm të Shqipërisë si faktor i sigurisë rajonale dhe partner i besueshëm e proaktiv i BE-së, tërësisht i linjëzuar me politikat e Unionit, përfshirë mbështetjen e pakushtëzuar për Ukrainën, transmeton Arbresh.info.

Spiropali nënvizoi gjithashtu se integrimi i Ballkanit Perëndimor në BE, përfshirë Kosovën, përbën një investim strategjik për të ardhmen e përbashkët nën qiellin europian.

Postimi i plotë:

Me shumë kënaqësi u takova sot me Zëvendës Presidenten e Komisionit Europian dhe Përfaqësuesen e Lartë të BE për Politikën e Jashtme dhe të Sigurisë, Kaja Kallas, për angazhimin e mëtejshëm të Shqipërisë si faktor i sigurisë rajonale, partner i besueshëm e proaktiv i BE-së, tërësisht i linjëzuar me politikat e Unionit, përfshirë në mbështetjen e vazhdueshme dhe të pakushtëzuar për Ukrainën.

E falenderova Kryediplomaten Europiane për mbështetjen financiare që Unioni vijon t’i japë Shqipërisë, përfshirë edhe sigurinë e mbrojtjen.

Theksova bindjen e plotë se integrimi i Ballkanit Perëndimor në BE, përfshirë Kosovën, është një investim strategjik për të ardhmen e përbashkët nën qiellin europian./Arbresh.info