Sunderland ka arritur një fitore të madhe në udhëtim te Chelsea, në kuadër të xhiros së nëntë të Premier League, duke triumfuar me rezultat 1-2.

Chelsea ishte skuadra më dominues gjatë pjesës më të madhe të ndeshjes, por Sunderland u tregua më efikas dhe mori pikët e plota në fund.

Pas vetëm katër minutash lojë, Alejandro Garnacho shënoi nga afërsia pas asistimit të Pedro Netos, duke kaluar “Blutë” në epërsi.

Megjithatë, mysafirët reaguan shpejt – Wilson Isidor përfitoi nga një kundërzbritje dhe barazoi rezultatin në minutën e 22-të.

Në pjesën e dytë, loja u qetësua me pak raste të pastra, derisa kur gjithçka dukej se do të mbyllej në barazim, Chemsdine Talbi realizoi një supergol në minutën 90+3, pas asistimit të Brobbey, duke vulosur fitoren e madhe të Sunderlandit.

Pas këtij triumfi, Sunderland ngjitet në vendin e dytë në tabelë me 17 pikë, ndërsa Chelsea bie në pozitën e shtatë me 14 pikë.