Ish-presidenti i Kosovës, Behgjet Pacolli, ka reaguar pas deklaratave të bëra në një emision televiziv në Shqipëri, ku u pretendua se Qeveria Shqiptare po financon ndërtimin e Aeroportit të Vlorës.

Pacolli e ka quajtur këtë pretendim “plotësisht të pavërtetë”, duke sqaruar se ndërtimi i aeroportit financohet tërësisht nga koncesionari dhe jo nga buxheti i shtetit, shkruan Arbresh.info.

“As Qeveria Shqiptare, e as ndonjë qytetar shqiptar, nuk ka paguar dhe nuk do të paguajë asnjë qindarkë për ndërtimin e këtij aeroporti. Të gjitha investimet mbulohen nga koncesionari, i cili do t’i rikuperojë mjetet e investuara gjatë afatit të përcaktuar në kontratë”, ka deklaruar Pacolli.

Ai shtoi se kontrata parashikon vetëm një garanci minimale të pasagjerëve, e cila është praktikë e zakonshme në marrëveshje të tilla ndërkombëtare dhe që realizohet pa asnjë vështirësi.

Në fund, Pacolli u bëri thirrje mediave që të mos përhapin dezinformata:

“Mos e helmoni kulturën e informimit publik me lajme të shtrembëruara. Dezinformimi nuk është thjesht gabim — është papërgjegjësi që dëmton publikun dhe krijon konfuzion të panevojshëm.”, u shpreh ai./Arbresh.info/