Në kuadër të shënimit të Ditës Ndërkombëtare të Gruas Rurale, sot në Prishtinë është hapur panairi i produkteve të grave në agrobiznes.

Ky panair ka për qëllim promovimin e fuqizimit ekonomik të grave dhe nxitjen e pjesëmarrjes së tyre aktive në sektorin e agrobiznesit, duke vlerësuar rolin e tyre si thelbësor në zhvillimin e qëndrueshëm të këtij sektori, përkundër sfidave të shumta me të cilat përballen.

Zëvendësministri në detyrë i Ministrisë së Bujqësisë, Imri Demelezi, theksoi përkushtimin e Qeverisë së Kosovës për mbështetjen e grave në bujqësi.

“Qeveria e Kosovës dhe Ministria e Bujqësisë e konsideron rolin e grave thelbësor në shoqëri si parim moral dhe ekonomik. Si qeveri e Kosovës, gjatë këtyre viteve kemi tentuar në maksimum, në rrethana dhe buxhetin që kemi, t’i kushtojmë rëndësi rolit të grave në shoqëri, sidomos për të arritur targetin e barazisë gjinore, pasi që po flasim për 50% të shoqërisë sonë. Roli i tyre është thelbësor për zhvillimin e qëndrueshëm shoqëror. Gjatë viteve të fundit kemi tentuar të japim fokus të veçantë çështjeve financiare dhe hapjes së llogarive bankare”, tha Demelezi.