Në Amfiteatrin e Teatrit Kombëtar të Kosovës, në Pallatin e Rinisë në Prishtinë, sot po mbahen homazhe për aktorin e mirënjohur, Enver Petrovci.

Familjarë, kolegë, figura të artit, kulturës e politikës, si dhe qytetarë të shumtë po i japin lamtumirën e fundit njërit prej emrave më të shquar të skenës shqiptare.

Me këtë rast, është hapur edhe libri i zisë, ku të pranishmit po lënë shënimet e tyre për të kujtuar jetën dhe veprën e Petrovcit.

Homazhe kanë bërë edhe kryetari i LDK-së, Lumir Abdixhiku, kryetari i Prishtinës, Përparim Rama, si dhe disa deputetë të Lidhjes Demokratike të Kosovës.

Aktori u nda nga jeta në moshën 71 vjeçare duke lënë pas një trashëgimi të pasur artistike në teatër, film e letërsi, si një ndër personalitetet më të rëndësishme të kulturës shqiptare.

Ceremonia e varrimit do të mbahet sot në ora 17:00 në varrezat e qytetit të Prishtinës./ Arbresh.info