Francesco Acerbi, i njohur si “Leone”, u rrëfye me emocione në “Verissimo”, duke kujtuar familjen, karrierën dhe betejat e tij jashtë fushe: “Pseudonimi më erdhi nga një mik i Pavias, por e ndiej se më përfaqëson. Jam pak si luani, i vetëm, por që e di çfarë do”.

Sa i përket kombëtares, Acerbi ishte i qartë: “Nuk e kam refuzuar kurrë Italinë, vetëm ndeshjen me Norvegjinë. Spalletti nuk më thirri për një vit dhe nuk më dukej e drejtë t’i përgjigjesha pas deklaratave të tij. Nëse Gattuso nuk më do, nuk është problem, ai zgjedh. Nuk do të bëj polemika”.

Momenti më prekës ishte kujtimi i të atit: “Ishte shumë kërkues, ndonjëherë humbisja dëshirën për futboll. Por falë tij nuk u dorëzova. S’i kam thënë kurrë ‘të dua’, është një peng i madh”.

Acerbi foli edhe për periudhën e errët me alkoolin dhe kancerin: “Nuk isha alkoolist, por futbolli s’më interesonte më. Pastaj erdhi diagnoza, operacioni dhe kimioterapia. Aty vendosa të ndryshoj; lashë pijet, fillova të stërvitem seriozisht. Ishte një rilindje e vërtetë”.