Rusia dhe Vietnami kanë zhvilluar një metodë të fshehtë për të maskuar pagesat e marrëveshjeve të armëve, në mënyrë që t’i shmangen sanksioneve nga SHBA e vendet e Perëndimit, duke përdorur fitimet nga ndërmarrjet e përbashkëta të naftës dhe gazit për të shlyer kontrata mbrojtëse pa kryer transferta të hapura parash përmes sistemit global bankar.

Sipas këtij sistemi, Vietnami ka blerë pajisje ushtarake ruse, përfshirë avionë luftarakë, tanke dhe anije, me kredi nga Moska, dhe më pas e ka shlyer këtë kredi nga pjesa e fitimeve të veta nga një kompani e përbashkët nafte e gazit Vietnam-Rusi që operon në Siberi. Transaksione të tilla janë të parregullta në tregjet financiare ndërkombëtare dhe, në këtë rast, synojnë të mbajnë rrjedhjen e parave në heshtje edhe nëse forcohen sanksionet që synojnë t’i japin fund luftës së Rusisë në Ukrainë, thuhet qartë në dokumente, raporton AP.

Zbulimi vjen në një moment të ndjeshëm, kur SHBA po përpiqet të forcojë lidhjet me Vietnamin si një pengesë ndaj rritjes së ndikimit kinez në Azinë Juglindore dhe ndërkohë ka negociata tregtare në vazhdim me Hanojin, pas vendimit të Shtëpisë së Bardhë për të vendosur tarifa 20%, ndërsa presidenti Donald Trump po kërcënon me sanksione edhe më të rrepta ndaj Moskës.

Bashkimi Evropian ka shtuar gjithashtu një sërë sanksionesh për të ushtruar presion mbi presidentin rus, Vladimir Putin, që t’i japë fund luftës, dhe Trump së fundi ka nxjerrë një urdhër ekzekutiv duke dyfishuar tarifat për Indinë në 50% për të ushtruar presion mbi Nju Delhin që të ndalojë blerjen e naftës dhe pajisjeve ushtarake ruse, të cilat, sipas tij, po ndihmojnë në vazhdimin e luftës kundër Ukrainës.

Organizata Trump, biznesi familjar i presidentit, nisi gjithashtu më herët këtë vit ndërtimin e një kompleksi luksoz golfi me vlerë 1.5 miliardë dollarë në periferi të kryeqytetit Hanoi, pasi Vietnami e miratoi me procedurë të përshpejtuar. Djemtë e presidentit e drejtojnë organizatën, por deklaratat financiare të qershorit treguan se vetë Trump përfiton nga shumë prej aktiviteteve të saj.

Lajmi se kjo marrëveshje e pazakontë ishte në përgatitje u zbulua në vitin 2023. Por, në vend që ta ndalonin, një dokument i brendshëm nga viti i kaluar tregon se Rusia dhe Vietnami e finalizuan dhe e zbatuan atë, duke bërë gjithashtu marrëveshje për të siguruar që ajo të prodhonte fonde të mjaftueshme për blerje të ardhshme ushtarake./rtk