Deputeti Nenad Rashiq ka deklaruar se vendimi i djeshëm i Shteteve të Bashkuara për të pezulluar për një kohë të pacaktuar dialogun strategjik me Kosovën përbën paralajmërimin më të qartë që ka dhënë SHBA-ja deri më tani.

Sipas tij, e Ngarkuara me Punë në Ambasadën Amerikane në Prishtinë, Annu Prattipati, e kishte sinjalizuar këtë veprim gjatë një takimi që kishin zhvilluar dy ditë më parë.

Rashiq tha se vendimi i Uashingtonit lidhet kryesisht me kritikat që qeveria Kurti dhe partia e tij kanë bërë ndaj Gjykatës Kushtetuese.

“Zonja Annu Prattipati, të cilën e pashë dy netë më parë në një pritje, në një farë mënyre njoftoi se kjo mund të ndodhte dhe se këto gjëra, veçanërisht brenda institucioneve, veçanërisht në aspektin e kritikave ndaj Gjykatës Kushtetuese. Gjykata Kushtetuese konsiderohet si një nga institucionet më kompetente që deri më tani ka zgjidhur kryesisht raste të bllokimeve të tilla si ato që kemi tani. Ndoshta, jam i sigurt se kur të merret vendimi i Gjykatës Kushtetuese, ne do ta respektojmë atë vendim në maksimum”, ka thënë Rashiq për Rtv Kim.

Deputeti ka theksuar gjithashtu se vendimi i SHBA-së nuk ka të bëjë me trajtimin e serbëve nga ana e qeverisë së Kosovës.