Vlora Çitaku: Gjykata Speciale po deformon drejtësinë, luftëtarë janë braktisur nga institucionet

18:50 | 4 Shtator 2025
E.H

Nënkryetarja e PDK-së, Vlora Çitaku, ka kritikuar ashpër veprimet e Gjykatës Speciale dhe qëndrimin e institucioneve të Kosovës ndaj proceseve gjyqësore që po zhvillohen kundër krerëve të UÇK-së.

Çitaku ka deklaruar se ajo që po bën Gjykata Speciale është “deformim i drejtësisë dhe përndjekje”, ndërsa ka shtuar se heshtja e institucioneve të Kosovës është “shurdhuese”.

Sipas saj, liderët e UÇK-së nuk mbrohen me “fjalime boshe apo deklarata populiste”, por me veprime konkrete, diskrete dhe institucionale.

“Fatkeqësisht, luftëtarët tanë janë braktisur nga institucionet. Ministria e Jashtme dhe Presidenca, në rrethana të tilla, do të duhej ta kishin këtë çështje prioritet kombëtar. E Kurti, që nuk ka asnjë problem të ofendojë e të sulmojë prokurorë e gjyqtarë të Kosovës, përballë Speciales nuk guxon as të hapë gojën. Të mjerë”, ka shkruar Çitaku.