Kryetari i Listës Serbe, Zlatan Elek, ka deklaruar në një intervistë për Radiotelevizionin e Serbisë (RTS) se lufta politike dhe ligjore për mbijetesën e serbëve në Kosovë do të vazhdojë.

Ai ka theksuar rëndësinë e zgjedhjeve lokale të 12 tetorit, duke i cilësuar ato si një moment vendimtar për komunitetin serb në Kosovë, veçanërisht për ata që jetojnë në komunat me shumicë serbe.

“Këto janë zgjedhje vendimtare, nëse jo më të rëndësishmet, për serbët në Kosovë…Është e nevojshme të jemi të bashkuar dhe të përfaqësohemi nga përfaqësuesit tanë”, ka theksuar ai.

Sipas tij, mbështetja më e madhe në këtë proces do të vijë nga vetë populli serb dhe nga Republika e Serbisë, ndërsa ndihma nga bashkësia ndërkombëtare, megjithëse e mirëpritur, nuk do të jetë vendimtare.