Presidenti amerikan, Donald Trump ka shkruar një mesazh të shkurtër, por domethënës në rrjetin social Truth Social

“RREZIK I LARTË!!!”, shkroi Trump me shkronja të mëdha, teksa po nisej nga Uashingtoni drejt Alaskës, ku pritet të takohet me presidentin rus, Vladimir Putin.

Ky takim mes dy liderëve zhvillohet në një nga zonat më të ndjeshme gjeostrategjike – Alaskë, një territor që ndodhet midis SHBA-së dhe Rusisë, dhe që historikisht ka pasur rol kyç në arkitekturën mbrojtëse të Shteteve të Bashkuara, sidomos gjatë Luftës së Ftohtë.

Takimi do të mbahet në bazën ushtarake Joint Base Elmendorf-Richardson, një nga instalacionet më të rëndësishme të mbrojtjes ajrore amerikane, që tradicionalisht ka shërbyer si pikë nevralgjike për reagimin ndaj çdo kërcënimi potencial nga rajoni i Arktikut dhe më gjerë.

Ndërsa përmbajtja e diskutimeve mes Trump dhe Putinit nuk është bërë ende publike, mesazhi enigmatik i Trump ka ngjallur spekulime të shumta: A ka të bëjë me një kërcënim të afërt gjeopolitik, me një zhvillim të paparashikuar apo është pjesë e një strategjie të mirëpërcaktuar për të krijuar atmosferë tensioni para takimit?

Mediat amerikane dhe ndërkombëtare po ndjekin në mënyrë intensive çdo zhvillim nga Alaska, ndërsa analiza dhe interpretimet mbi domethënien e këtij takimi vazhdojnë të shtohen nga orë në orë.