Tifozët zyrtarë të Kombëtares së Kosovës “Dardanët” kanë dalë në përkrahje të protestës që është paraparë të zhvillohet këtë të enjte kundër Gjykatës Speciale, në lidhje me zhvillimet e fundit.

Ata duan të përçojnë mesazh të qartë se janë përkrah ish-krerëve të Ushtrisë Çlirimtare të Kosovës, ndërsa i kanë ftuar anëtarët e tyre që t’i bashkohen në mënyrë masive kësaj proteste.

Më poshtë mund ta shihni postimin e “Dardanëve” në rrjetet sociale.

“Jo vetëm se kreu ynë ka qenë pjesë e lavdishme e UÇK-së, por se lufta e kësaj të fundit ka qenë sublime dhe një nga më të mëdhatë në qindvjeçarin e fundit, Dardanët do ta mbështesin protestën e së enjtes ndaj Gjykatës Speciale, lidhur me zhvillimet e fundit karshi padrejtësisë që po iu bëhet ish-krerëve të Ushtrisë Çlirimtare të Kosovës. Ftojmë secilin anëtar të Dardanëve që të jetë pjesë e kësaj proteste, në atë mënyrë që të përçojmë mesazh të qartë se qëndrojmë përkrah njerëzve që zgjodhën lirinë e vendit si të vetmen alternativë”, shkruhet në njoftimin e tifogrupit të Kosovës.

Kjo protestë mbahet me 7 gusht nga ora 17:00 në sheshin “Skënderbeu” në Prishtinë./Arbresh.info