Kryeministri i Maltës, Robert Abela, tha të martën në mbrëmje se Malta do të shpallë njohjen e shtetit palestinez gjatë Asamblesë së Përgjithshme të Kombeve të Bashkuara në shtator.

Abela bëri këtë njoftim disa orë pas një deklarate të ngjashme nga kryeministri britanik Keir Starmer dhe disa ditë pasi Franca gjithashtu njoftoi planet e saj për njohje.

“Qëndrimi ynë pasqyron përkushtimin tonë ndaj përpjekjeve për një paqe të qëndrueshme në Lindjen e Mesme,” tha Abela në një postim në Facebook.

Qeveria e Maltës ka qenë nën presion në rritje nga brenda radhëve të saj për të njohur shtetin palestinez, ndërsa opozita qendrore-djathtiste në mes të korrikut bëri thirrje për njohje të menjëhershme, shkruan Reuters.

Ishulli mesdhetar dhe anëtar i Bashkimit Evropian ka një histori mbështetjeje për çështjet palestineze dhe ka mbështetur përpjekjet për një zgjidhje me dy shtete.

Abela njoftoi për herë të parë planet për njohjen e shtetit palestinez në maj, duke thënë se kjo do të ndodhte gjatë një konference të Kombeve të Bashkuara në qershor, por konferenca më pas u shty.

Irlanda, Norvegjia dhe Spanja njohën Palestinën si shtet të pavarur në maj./rtk