Pas disa ditësh kërkimesh intensive, trupat e Forcës së Sigurisë së Kosovës kanë lokalizuar dhe nxjerrë trupin e pajetë të 33-vjeçarit, i cili ishte zhdukur të dielën pasi kishte kërcyer nga ura në Liqenin e Ujmanit dhe nuk ishte parë më të dilte nga uji.

Lajmin e konfirmoi Genc Metaj, drejtor i Agjencisë për Menaxhimin e Emergjencave.

Ai falënderoi të gjitha ekipet e përfshira në këtë operacion dhe u shprehu ngushëllime familjarëve të viktimës.

“Tani është e konfirmuar se ekipet e Forcës së Sigurisë së Kosovës kanë arritur që ta gjejnë trupin e pajetë të 33-vjeçarit në liqenin e Ujmanit. Urojmë që ky të jetë rasti i fundit i një ngjarje të tillë. Dua të shpreh mirënjohje për FSK-në, Policinë e Kosovës, Zjarrfikësit, ekipet e kërkim-shpëtimit etj. Është moment i dhimbshëm, por i falënderojmë për profesionalizmin e tyre. Operacioni mbyllet këtu, tani mbeten në dorën e policisë procedurat e mëtejshme”, tha Metaj.

Zëvendësdrejtori i Policisë për rajonin e veriut, Veton Elshani, bëri të ditur se rasti po trajtohet si vdekje e dyshimtë dhe se hetimet do të vazhdojnë pas autopsisë.

“Policia, në momentin që ka pranuar informacionin për rastin, e ka trajtuar si vdekje të dyshimtë, sepse është hedhur nga ura dhe duhet të shihen edhe elemente tjera që kanë çuar në këtë akt. Trupi është sjellë në ndërtesën e Kryqit të Kuq, është identifikuar nga familjarët dhe tani presim Institutin e Mjekësisë Ligjore për autopsinë. Pas saj, do të vazhdojmë me hetimet”, theksoi Elshani.