Në kuadër të vizitës në Singapor, zëvendësministri në detyrë i Punëve të Jashtme dhe Diasporës, Kreshnik Ahmeti, zhvilloi një takim me Ministren e Shtetit për Punë të Jashtme, Tregti dhe Industri të Singaporit, Gan Siow Huang.

Në fokus të diskutimeve ishte bashkëpunimi ekonomik dhe forcimi i lidhjeve ndërmjet komuniteteve të biznesit të të dyja vendeve.

Palët shkëmbyen ide për mekanizma të përbashkëta që do të mundësonin rritjen e shkëmbimeve tregtare dhe nxitjen e investimeve. Gjithashtu, u trajtua nevoja për ndërtimin e bazës juridike përmes marrëveshjeve bilaterale në fusha me interes të përbashkët.

“Zëvendësministri në detyrë Ahmeti prezantoi zhvillimet më të fundit ekonomike në Kosovë dhe përparimin e vendit në reformat demokratike dhe agjendën evropiane. Në këtë kontekst, u theksua edhe rëndësia e lehtësimit të lëvizjes drejt Singaporit për qytetarët e Kosovës, përfshirë shqyrtimin e mundësisë për liberalizim të vizave për mbajtësit e pasaportave të rregullta në të ardhmen. Po ashtu, u diskutua për bashkëpunimin ndërmjet akademive diplomatike dhe shkëmbimin e përvojave profesionale”, thuhet në njoftimin për media.

Në përmbyllje të takimit, Ahmeti e uroi Gan për përvjetorin e 60-të të Pavarësisë së Republikës së Singaporit, duke shprehur urimet më të mira për popullin dhe institucionet e këtij vendi mik./Arbresh.info