Presidenti amerikan Donald Trump ka thënë se Volodymyr Zelensky nuk duhet ta shënjestrojë Moskën me sulme, pasi njoftoi se më shumë armë do të dërgoheshin në Ukrainë dhe e ashpërsoi qëndrimin e tij ndaj Rusisë.

Komentet e tij vijnë pasi Financial Times raportoi se Trump e kishte pyetur homologun e tij ukrainas nëse Kievi mund ta sulmonte Moskën, nëse SHBA-të ofronin armë me rreze të gjatë veprimi, transmeton Telegrafi.

Duke folur para se të largohej nga Shtëpia e Bardhë, Trump tha se “do të shohë se çfarë do të ndodhë me presidentin Putin” pasi i dha Moskës një ultimatum 50-ditor për të rënë dakord për një marrëveshje paqeje ose do të përballej me tarifa “të rënda”.

Ai tha se deri më tani ka qenë “shumë i zhgënjyer” me udhëheqësin rus.

I pyetur nëse ishte në anën e Ukrainës tani, ai u përgjigj “Nuk jam në anën e askujt”, duke shtuar se është në “anën e njerëzimit” dhe duke thënë: “Dua të ndaloj vrasjen e mijëra njerëzve në javë”.