Eugen Cakolli nga Instituti Demokratik i Kosovës e ka komentuar vendimin e Gjykatës Supreme që shpalli të paligshëm vendimin e ministrit në detyrlë, Hekuran Murati për arkat fiskale.

Sipas tij, Supremja ka qartësuar përfundimisht se (ish-)ministrat, tashmë me mandat si deputetë, nuk mund të vazhdojnë të ushtrojnë funksione ekzekutive pas certifikimit të rezultateve nga KQZ.

“Çdo vendim i marrë prej tyre pas 27 marsit është nul dhe bie ndesh me Kushtetutën, si dhe parimin e ndarjes së pushteteve. Po ashtu, Gjykata konfirmoi se anëtarët e Qeverisë nuk mund të marrin vendime, sepse teknikisht Qeveria aktuale nuk ka më mandat për t’i miratuar ato”, ka shkruar Cakolli.

“Këtë e kemi thënë prej muajsh. Megjithatë, pushteti ka këmbëngulur të sillet sikur kjo situatë nuk ekziston. Kryeministri dhe ministrat e certifikuar si deputetë kanë vazhduar të marrin vendime – jokushtetuese, pa legjitimitet dhe jashtë çdo mbikëqyrjeje parlamentare, duke e shndërruar shkeljen në praktikë”, theksoi ai.

Sipas Cakollit, nuk mund të ketë më “trillime juridike” pasi Supremja i ka dhënë vulë asaj që është ditur që nga fillimi.

“Sot nuk ka më trillime juridike. Gjykata Supreme e vulosi atë që ka qenë e qartë që nga dita e parë. Nuk mund të ulesh në dy karrige dhe të sillesh sikur s’ka ndodhur asgjë. Çdo ditë e kaluar në këtë shkelje është dëm për institucionet dhe për qytetarët. Mbi të gjitha, është bazë për ndjekje penale”, u shpreh mes të tjerash ai./Arbresh.info/

Supremja shpall të paligjshëm udhëzimin administrativ të Muratit për arkat fiskale