Sot, komandanti i misionit KFOR-it, Gjeneral Major Enrico Barduani, u takua me Zyrtarin e Lartë të Byrosë për Çështjet Evropiane dhe Euroaziatike të Departamentit të Shtetit të SHBA-së, SH.T. Brendan Hanrahan, në selinë e KFOR-it në Kampin Film City, në Prishtinë.

Hanrahan shoqërohej nga i Ngarkuari me Punë i Ambasadës së SHBA-së, SH.T. Anu Prattipati.

KFOR njofton se Barduani i dha një përditësim mbi situatën e sigurisë në Kosovë dhe në të gjithë rajonin.

Ai nënvizoi angazhimin e palëkundur të KFOR-it për të kontribuar në sigurinë e qëndrueshme në të gjithë Kosovën.

Ai gjithashtu përshëndeti kontributet e gjata dhe të vazhdueshme të SHBA-së në përpjekjet e KFOR-it dhe në stabilitetin rajonal.

“KFOR-i vazhdon të zbatojë mandatin e tij – bazuar në Rezolutën 1244 të Këshillit të Sigurimit të OKB-së të vitit 1999 – për të kontribuar në një mjedis të sigurt për të gjithë njerëzit dhe komunitetet që jetojnë në Kosovë dhe lirinë e lëvizjes. KFOR-i punon në koordinim të ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë (EULEX), në rolet e tyre përkatëse si reagues të sigurisë”, thuhet në njoftim./Arbresh.info