Deputeti i Lidhjes Demokratike të Kosovës (LDK), Avdullah Hoti, ka reaguar ndaj presidentes Vjosa Osmani, duke e akuzuar për hipokrizi në qëndrimin e saj ndaj Marrëveshjes së Washingtonit.

Përmes një postimi në Facebook, Hoti ka bashkëngjitur dy deklarata të presidentes – një nga viti 2021 dhe një tjetër nga viti 2025 – për të theksuar ndryshimin e qëndrimit të saj.

Sipas tij, Osmani dikur e cilësonte këtë marrëveshje si “cenim të rendit kushtetues” dhe “rrezik për shtetin”, ndërsa tani e konsideron “një marrëveshje të mirë” dhe pohon se është zbatuar.

Postimi i plotë i Hotit:

Asgjë e re nga Osmani, vetem hipokrizi e radhës!

Osmani, që dikur e quante Marrëveshjen e Uashingtonit cenim të rendit kushtetues dhe rrezik për shtetin, sot – pas 5 vitesh – e quan “marrëveshje të mirë” dhe madje pretendon se “e kemi zbatuar”.

Kjo është ajo që ndodh kur fitimi dhe mbajtja e pushtetit bëhet më i rëndësishëm se interesi shtetëror. Marrëveshja që dikur e luftonte për vota, sot shërben për lavdi të rreme.

Jo, ti e Kurti nuk e keni zbatuar këtë marrëveshje. E keni luftuar atë. Tani po mundohi ta përvetësoni kur kanë ndryshuar rrethabat politike në SHBA. Ky është kulmi i mashtrimit politik./Arbresh.info