Të paktën 16 persona humbën jetën të mërkurën gjatë protestave mbarëkombëtare kundër qeverisë në Kenia, shumica e tyre të vrarë nga forcat e policisë.

Protestat u organizuan për të përkujtuar demonstratat e një viti më parë, gjatë të cilave mbi 60 persona u vranë në përplasjet kundër një projektligji për rritjen e taksave, që kulmuan me sulmin ndaj Parlamentit kenian.

Mijëra qytetarë u mblodhën sërish në rrugët e kryeqytetit Nairobi dhe në qytete të tjera për të kërkuar llogaridhënie dhe reforma qeveritare. Sipas mediave lokale, policia reagoi me përdorimin e gazit lotsjellës për të shpërndarë protestuesit.

Ngjarja shënon një përshkallëzim të mëtejshëm të tensioneve mes qytetarëve dhe autoriteteve, ndërsa organizatat për të drejtat e njeriut po bëjnë thirrje për një hetim të pavarur mbi përdorimin e forcës nga ana e policisë dhe trajtimin e protestuesve.

Amnesty Kenya ka paralajmëruar për rrezikun e shtimit të dhunës shtetërore nëse nuk merren masa urgjente për të mbrojtur të drejtat qytetare dhe për të siguruar transparencë nga autoritetet.