Kompania Rajonale e Mbeturinave “Pastrimi” Sh.A. u ka bërë thirrje të gjithë qytetarëve të Komunës së Prishtinës që të përmbushin obligimin ligjor për pagesën e faturave për shërbimin e grumbullimit dhe menaxhimit të mbeturinave.

“Ky obligim bazohet në Rregulloren për Menaxhimin e Mbeturinave, të miratuar nga Kuvendi Komunal i Prishtinës, e cila është validuar nga Ministria e Administrimit të Pushtetit Lokal dhe Ministria e Mjedisit. Për më tepër, kjo rregullore ka kaluar edhe verifikimin gjyqësor, pasi Gjykata Supreme e Republikës së Kosovës ka refuzuar kërkesën e Komunës për pezullimin e saj, duke i dhënë rregullores fuqi të plotë ligjore dhe zbatuese”, thuhet në njoftim.

Përmes një komunikate për media, kompania “Pastrimi” ka deklaruar se pagesa e faturave për shërbimin e mbeturinave është detyrim ligjor për të gjithë qytetarët.

“Pagesat e rregullta mundësojnë ofrimin e një shërbimi më të mirë, më të shpejtë dhe më të qëndrueshëm në kryeqytet. Pagesat mund të realizohen edhe online përmes platformës zyrtare e-Kosova, si dhe në sportelet e kompanisë”, thuhet në njoftim./Arbresh.info