Zyrtarë të lartë të administratës së Donald Trump do të takohen me një delegacion kinez në Londër të hënën, për raundin e radhës të negociatave tregtare.

Në një postim në Truth Social, Trump shprehu bindjen se takimi do të shkojë shumë mirë dhe tha se Shtetet e Bashkuara do të përfaqësohen nga Sekretari i Thesarit, Scott Bessent, Sekretari i Tregtisë, Howard Lutnick dhe Përfaqësuesi i Tregtisë, Jamieson Greer.

Data e takimit vjen pas një telefonate mes Trump dhe udhëheqësit kinez Xi Jinping të enjten, të cilën presidenti amerikan e quajti shumë pozitive.

Trump dhe Xi ranë dakord të vizitojnë vendet e njëri-tjetrit dhe u kërkuan përfaqësuesve të tyre të zhvillojnë bisedime ndërkohë.

Shtetet e Bashkuara dhe Kina kanë qenë në një luftë tregtare pasi Donald Trump mori detyrën si president më 20 janar.

Më 12 maj, Kina dhe SHBA-të arritën një marrëveshje 90-ditore në Gjenevë për të ndaluar tarifat hakmarrëse të vendosura ndaj njëri-tjetrës.

Që kur u kthye në Shtëpinë e Bardhë në janar, Trump ka kërcënuar vazhdimisht me një sërë masash ndëshkuese ndaj partnerëve tregtarë, por i ka ndryshuar vazhdimisht.

Në vitet e fundit, Shtetet e Bashkuara e kanë identifikuar Kinën si rivalen e saj kryesore gjeopolitike dhe të vetmin vend në botë që është në gjendje ta sfidojë ekonomikisht dhe ushtarakisht.