Napoli është shpallur kampion i Serie A, duke triumfuar me rezultat 2-0 ndaj Cagliarit – një fitore ku kontribut dha edhe Amir Rrahmani me një asist të jashtëzakonshëm.

Java e 38-të e sezonit shënoi fundin e këtij edicioni për napolitanët e drejtuar nga Antonio Conte. Ata arritën ta mposhtin Interin në garën për titull, edhe pse zikaltërit fituan gjithashtu 2-0 ndaj Comos.

Napoli e nisi takimin me intensitet të lartë, duke rrezikuar disa herë portën e shqiptarit Alen Sherri, që mbron për Cagliarin.

Goli i parë erdhi në minutën e 42-të, kur Mattia Politano asistoi për Scott McTominay, i cili shënoi me një goditje akrobatike.

Në minutën e 51-të, Amir Rrahmani asistoi nga mbi 60 metra për Romelu Lukakun, i cili finalizoi saktë për 2-0. Pas këtij goli, e gjithë stoli i Napolit dhe trajneri Conte shpërthyen në festë, ndërsa Rrahmani ndau një përqafim simbolik me Lukakun si dy kampionë të vërtetë.

Fitorja 2-0 mjaftoi që Napoli të siguronte titullin kampion për herë të katërt në histori në Serie A.

Ky është titulli i dytë i Rrahmanit me Napolin, pas triumfit të parë para dy sezonesh nën drejtimin e Luciano Spallettit.

Napoli e mbyll sezonin me 82 pikë, një më shumë se Interi, ndërsa Antonio Conte ka ndërtuar një skuadër jashtëzakonisht konkurruese brenda futbollit italian.