Policia e Kosovës, sot ka realizuar një operacion policor të koduar me emrin “Medikamenti”, i cili ka rezultuar me arrestimin e nëntë personave të dyshuar për kontrabandim të medikamenteve.

Pas gjashtë muajsh hetimesh intensive të realizuara nga Sektori i Hetimeve të Departamentit të Policisë Kufitare, është realizuar ky operacion i gjerë policor, i cili ka përfshirë dy rajone të Kosovës.

Operacioni policor është realizuar në bashkëpunim me Doganat e Kosovës dhe Inspektoratin për Pajisje dhe Produkte Medicinale, me ç’rast është bërë bastisja e shtatëmbëdhjetë lokacioneve të ndryshme, në regjionin e Prishtinës dhe Pejës.

Gjatë bastisjes janë gjetur dhe konfiskuar sasi e madhe e barnave (mijëra produkte medicinale) që dyshohet se janë të pakontrolluara dhe të paverifikuara, me prejardhje kryesisht nga Serbia të kontrabanduara në Republikën e Kosovës në mënyrë ilegale.

Pas bastisjes janë arrestuar dhe dërguar në mbajtje të dyshuarit: K. V.,S. R., V. A., A. A. A.A., N. Z., A. J. Dhe A. B.

Sipas Policisë të arrestuarit dyshohet se në mënyrë të organizuar dhe në bashkëpunim kanë kontrabanduar barna të ndryshme, duke dëmtuar buxhetin e Kosovës.

Me këtë rast dyshohet se këta persona kanë kryer veprat penale ‘kontrabandim me mallra’, ‘shmangie nga pagesa e tarifave të detyrueshme doganore’, ‘ushtrim i kundërligjshëm i veprimtarisë mjekësore dhe farmaceutike’, ‘krim i organizuar’ dhe ‘posedim i paautorizuar i armëve dhe municionit’.

Gjatë kontrollimit të lokacioneve janë gjetur dhe konfiskuar një revole të kal.7.62 mm dhe dy pushkë gjuetie.

Operacioni i bastisjeve dhe arrestimeve është kryer me urdhër të Prokurorisë, respektivisht Gjykatës Themelore në Prishtinë.