Avdi Hoti është zgjedhur kryetar i ri i Sindikatës së Policisë së Kosovës, ndërsa Edita Azemi është zgjedhur nënkryetare, në Kuvendin e V-të Zgjedhor të mbajtur sot në sallën e konferencave të Stacionit Policor “Qendra” në Prishtinë.

Sipas njoftimit, zgjedhjet u zhvilluan në një proces të rregullt, transparent dhe demokratik, ku delegatët e pranishëm votuan për strukturat e reja drejtuese të këtij mekanizmi sindikal të rëndësishëm.

Kryetari i sapozgjedhur, Avdi Hoti, falënderoi delegatët për besimin dhe theksoi rëndësinë e këtij forumi si një dëshmi e demokracisë së brendshme sindikale dhe përkushtimit për avancimin e të drejtave dhe mirëqenies së punonjësve të Policisë së Kosovës.

“Ky Kuvend është dëshmi e demokracisë së brendshme sindikale dhe e përkushtimit tonë për të avancuar të drejtat dhe mirëqenien e punonjësve të Policisë së Kosovës. Përmes këtij forumi ne jo vetëm që reflektojmë mbi arritjet dhe sfidat, por gjithashtu nderojmë rrugën për të ardhmen – një të ardhme të sigurt, më të drejtë dhe më të denjë për të gjithë pjesëtarët e Policisë së Kosovës. Jemi të vetëdijshëm për sfidat me të cilat përballet policia jonë, qoftë në aspektin e punës, ashtu edhe në atë social-ekonomik, por jemi po aq të vendosur që përmes organizimit dhe zërit sindikal t’i realizojmë të gjitha kërkesat e punonjësve të Policisë së Kosovës”, tha ai./Arbresh.info