Prokuroria Speciale e Republikës së Kosovës ka ngritur sot aktakuzë ndaj një mësimdhënësi me inicialet M.H., në shkollën ‘Xhemail Mustafa’ në Prishtinë ,nën dyshimet për kryerjen e veprës penale “Nxitja e përçarjes dhe mosdurimit”.

Sipas njoftimit të Prokurorisë, i pandehuri M.H., në cilësinë e personit zyrtar (mësimdhënës), me qëllim të nxitjes së urrejtjes, përçarjes dhe mos durimit midis grupeve kombëtare, etnike dhe fetare në Kosovë, i njëjti me rastin e festimit të ditës së flamurit kombëtar, publikisht ka ndërmarr veprime konkrete në drejtim të përdhosjes së simboleve kombëtare shqiptare, më konkretisht flamurit kombëtar dhe plisit.

Prokurori i rastit i ka propozuar Gjykatës Themelore në Prishtinë – Departamentit Special, që pas shqyrtimit të provave gjatë procesit gjyqësor, i pandehuri të shpallet fajtor dhe të dënohet sipas ligjeve në fuqi.

Po ashtu, Prokurori i rastit, ka kërkuar nga gjykata që në pajtim me nenin 62 të KPRK-së, ndaj të pandehurit M.H, t’i shqiptohet edhe dënimi plotësues “Ndalimi i ushtrimit të funksioneve në administratën publike ose në shërbimin publik”.

Ndërkohë, mësimdhënësi i gjuhës angleze, M.H., akuzohet për përjashtimin e një nxënëseje që refuzoi të hiqte plisin nga koka, si dhe për hedhjen e flamurit kuqezi në bërllok./Arbresh.info