Zëdhënësi i Bashkimit Evropian për Çështjet e Zgjerimit, Guillaume Mercier, ka deklaruar se ndonëse BE-ja nuk komenton mbi çështjet e brendshme të Kosovës apo të ndonjë vendi tjetër partner, është në interes të vetë Kosovës që të formojë sa më parë institucionet e saj.

Duke folur të enjten lidhur me dështimin e katërt me radhë për konstituimin e Kuvendit të Kosovës, Mercier tha se funksionalizimi i institucioneve është kyç për avancimin në rrugën evropiane.

“Ne nuk do të komentojmë çështjet e brendshme të Kosovës, sikurse nuk i komentojmë as për cilindo vend tjetër partner. Ajo që mund të them është se gjithsesi është në interes të Kosovës që të formojë shpejt institucionet e saj. Kjo është e rëndësishme për arritjen e reformave evropiane dhe për të lëvizur përpara në këtë rrugëtim. Është e rëndësishme edhe për çështje të tjera siç është Plani i rritjes. Siç e dini, na duhet që të kemi Kuvendin e Kosovës të konstituar në mënyrë që të vazhdojmë punën në këtë drejtim po ashtu“, tha ai./Arbresh.info