Giorgia Meloni njoftoi se presidenti Trump pranoi ftesën e saj për një udhëtim zyrtar në Romë, në takimin e tyre në Uashington, në një përpjekje të kryeministres italiane për të kapërcyer hendekun mes BE-së dhe SHBA-së në kohën e tensioneve tarifore tregtare.

“Qëllimi për mua është ta bëj Perëndimin sërish të madh”, ka deklaruar kryeministrja Meloni.

Trump hapi samitin në Zyrën Ovale të enjten duke thënë se Meloni “po bënte një punë fantastike” dhe e quajti mike, ndërsa të dy edhe më herët kishin shprehur optimizëm për zgjidhjen e konfliktit tregtar BE-SHBA.

BE-ja përballet me tarifa importi prej 25% për çelikun, aluminin dhe makinat, dhe tarifa më të gjera për pothuajse të gjitha mallrat e tjera, sipas politikës së Trump për të goditur vendet që ai thotë se imponojnë barriera të larta për importet amerikane.

“Jam e sigurt se mund të bëjmë një marrëveshje dhe unë jam këtu për të ndihmuar me këtë,” kishte thënë Meloni përpara samitit.

Trump tha se në përgjithësi ai priste që do të bënte një njoftim për marrëveshjet tregtare, por se nuk e kishte me nxitim.

“Ne do të kemi shumë pak problem për të bërë një marrëveshje me Evropën apo këdo tjetër, sepse ne kemi diçka që të gjithë duan”, ka thënë Trump.

Para se të nisej për në Uashington, Meloni diskutoi samitin me presidenten e Komisionit Evropian, Ursula von der Leyen.

Kancelari në largim i Gjermanisë, Olaf Scholz, dhe pasardhësi i tij, Friedrich Merz, diskutuan gjithashtu takimin me Melonin, sipas raporteve në edicionin gjerman të Politicos.

Scholz nuk arriti të takohej me Trump dhe kërkesa e Merz thuhet se është në pritje.

Meloni i kishte përshkruar më parë tarifat e Trump për mallrat e BE-së si “të gabuara”, por ajo duket se po merr një qasje më të kujdesshme pasi menaxhon një akt delikat balancues midis idealeve të saj politike, të cilat janë më në harmoni me ato të Trumpit, dhe rolit të Italisë brenda BE-së./rtk