Ngjarja që ka shkaktuar zemërim dhe debat të ashpër në rrjetet sociale në Shqipëri dhe Kosovë – incidenti fizik mes Jozefin Markut (Jozi) dhe reperit Gjesti në Big Brother VIP Albania 4 – tashmë ka kaluar kufijtë e rajonit dhe ka marrë vëmendje edhe nga media ndërkombëtare.

Një nga gazetat më të mëdha në Zvicër, 20 Minuten, i ka kushtuar një artikull të veçantë incidentit, duke pasqyruar momentin kur Jozi u përjashtua nga shtëpia dhe sulmoi fizikisht një nga finalistët e spektaklit.

“Bujë në ‘Big Brother VIP Albania’. Jozefin Marku u përjashtua nga shtëpia në gjysmëfinale të shtunën. Teksa u largua, i dha një shuplakë të fortë kandidatit Gjesti. Policia e arrestoi Markun”, shkruhet në artikullin e 20 Minuten, duke e përshkruar ngjarjen si të pazakontë për një spektakël televiziv.

Ky raportim shënon një tjetër moment të turpshëm për imazhin e edicionit të katërt të Big Brother VIP Albania, i cili këtë vit është komentuar jo vetëm për emocionet e lojës dhe marrëdhëniet mes banorëve, por edhe për skandale që kanë përfshirë dhunë dhe dënime penale të pjesëmarrësve.

Fakti që një incident i tillë ka gjetur vend edhe në një media prestigjioze të huaj si 20 Minuten, tregon se rrezatimi negativ i ngjarjes ka arritur përmasa ndërkombëtare, duke ngritur edhe më shumë pyetje rreth përgjegjësisë së produksionit dhe mekanizmave të sigurisë brenda formatit./Telegrafi

Skandal në Big brother: Jozi e gjuan Gjestin me shuplakë dhe e rrëzon për tok gjatë transmetimit direkt