Kina ka paralajmëruar se tarifat e vendosura nga Shtetet e Bashkuara mund të nxisin një “krizë humanitare,” pasi tensionet mes dy ekonomive më të mëdha në botë vazhdojnë të rriten për shkak të luftës tregtare të iniciuar nga presidenti amerikan Donald Trump.

Ministri kinez i Tregtisë, Wang Wentao, gjatë një thirrjeje me video të premten me drejtorin e përgjithshëm të Organizatës Botërore të Tregtisë, tha se tarifat e Shteteve të Bashkuara, të cilat janë reciproke, do të shkaktojnë dëm të madh për vendet në zhvillim, sidomos për ato më pak të zhvilluara.

Ai theksoi gjithashtu se këto tarifa mund të shkaktojnë një krizë humanitare.

“Tarifat ‘reciproke’ të Shteteve të Bashkuara do t’u shkaktojnë dëm të madh vendeve në zhvillim, veçanërisht vendeve më pak të zhvilluara, dhe madje mund të shkaktojnë një krizë humanitare,” tha Wang Wentao.

Në një deklaratë të publikuar nga Ministria e Tregtisë e Kinës, Wang theksoi se tarifat e vendosura nga administrata Trump kanë krijuar pasiguri dhe paqëndrueshmëri të madhe në tregjet globale.