Kryeministri i vendit, Albin Kurti, do ta pres sot në takim Sekretarin e NATO-s, Mark Rutte.

Sipas njoftimit, takimi do të mbahet me fillim nga ora 14:50.

Para kryeministrit Kurti, Sekretari i NATO-s do të pritet në takim nga Presidentja Osmani me të cilën do të mbajë edhe konferencë për media.

Vizita e Ruttes në Kosovë zhvillohet pas vizitës që ai bëri në Bosnje e Hercegovinë, më 10 mars, ku dha mesazhin që aleanca nuk do të lejojë që “të rrezikohet paqja e fituar me shumë vështirësi”.

“Nuk jemi në vitin 1992 dhe nuk do të lejojmë krijimin e ndonjë vakumi sigurie. E di që EUFOR-i [Forca e Bashkimit Evropian] është plotësisht i përgatitur për të garantuar ambient stabil të sigurisë”, ka thënë Rutte, duke iu referuar periudhës së shpërthimit të luftës në këtë shtet.

Ai ka deklaruar, po ashtu, se NATO-ja mbështet plotësisht sovranitetin dhe integritetin territorial të Bosnjës, dhe që Marrëveshja e Dejtonit – e cila u ka dhënë fund luftimeve më 1995 – është themeli që duhet të respektohet./Arbresh.info/