Në kuadër të shënimit të 27-vjetorit të Epopesë së UÇK-së, kreu i Federatës së Futbollit të Kosovës, Agim Ademi me bashkëpunëtorë ka bërë homazhe në Kompleksin Memorial “Adem Jashari” në Prekaz.

“Kjo vizitë përkujtimore e delegacionit të FFK-së u bë në shenjë nderimi për rezistencën dhe sakrificën sublime të Komandantit Legjendar, Adem Jashari, Familjes Jashari dhe të gjithë dëshmorëve të rënë për lirinë e Kosovës. Delegacioni i FFK-së vendosi buqetë me lule në varrezat e dëshmorëve, duke shprehur mirënjohjen e thellë për kontributin e tyre në historinë e vendit tonë”, thuhet në njoftimin e FFK-së.

Ndërkohë, kreu i futbollit kosovar në një postim në rrjetet sociale ka thënë se rezistenca dhe sakrifica sublime e Familjes Jashari dhe e gjithë dëshmorëve është gurthemeli i lirisë që ne sot e gëzojmë.

“Si popull, por edhe si komunitet i futbollit, e kemi obligim moral të kujtojmë dhe të nderojmë në vazhdimësi me pietet ata që na mundësuan të jetojmë të lirë e në një shtet sovran. Lavdi e përjetshme Komandantit Legjendar, Adem Jashari, Familjes Jashari dhe të gjithë dëshmorëve të kombit!”, ka shkruar Ademi./Arbresh.info/