Kandidatja e LDK-së për deputete, Hykmete Bajrami, ka bërë sonte një thirrje drejt Qeverisë Kurti, për veprim urgjent kundër situatës së krijuar me qentë endacakë.

Reagimi i saj vie vetëm pak kohë që kur u njoftua se një grua humbi jetën si pasojë e sulmit në zemër, nga paniku pasi po ndiqej nga qentë endacakë, shkruan Arbresh.info.

Ajo tha se kryeministri duhet të ftojë urgjentisht në takim Asociacionin e Komunave dhe të adresojë këtë problem.

”Thirrje për veprim urgjent kundër qenve endacakë Sot, në Podujevë ka humbur jetën një grua, pas një sulmi brutal nga qentë endacakë – tragjedi kjo që nuk duhet të ndodhë kurrë më! Është turp për të gjithë ne, për të gjitha institucionet; është paaftësi që 26 vjet pas lufte të na vdesin qytetarët nga qentë endacakë. Është koha e fundit për të vepruar, për të ndërmarrë masa. Lini strategjitë, lini tenderët, sepse deri më tani të gjitha përpjekjet e fragmentuara nëpër komuna kanë dështuar.”, ka shkruar ajo.

“Kryeministri në detyrë duhet të ftojë urgjentisht në takim Asociacionin e Komunave, Qeveria në detyrë duhet të ndajë fonde, të caktojë detyra dhe përgjegjësi për institucionet përkatëse, të caktoj afate kohore që trajtimi i qenve endacakë të fillojë mënjëherë, në nivel vendi. Po e përsëris: ky problem duhet të adresohet me urgjencë!”, u shpreh ajo.

“Tragjeditë si kjo e sotmja nuk duhet të kalojnë pa reagim institucional, dhe nuk po flas për deklarata me shkrim, por për veprime konkrete. Në fund të fundit, çfarë na duhen institucionet nëse nuk mund të ofrojnë siguri për qytetarët jashtë oborrit të tyre?
Ngushëllime familjes nga Podujeva!”, tha Bajrami.

Ndryshe, një grua në fshatin Obranqë të Podujevës ka vdekur pasi ka pësuar sulm në zemër nga frika nga qentë që po e ndiqnin.

Shefi i Urgjencës në Podujevë, Arben Beqiri, ka bërë me dije se e ndjera nuk ka pasur kafshime.

LEXO EDHE:

E dhimbshme | Pësoi sulm në zemër nga frika e qenve që e ndoqën, vdes e moshuara në Podujevë