Florian Wirtz është një nga futbollistët më të talentuar në botë dhe njëkohësisht edhe një nga më të kërkuarit.

Mesfushori ofensivë gjerman po shkëlqen me fanellën e Bayer Leverkusenit dhe duket se nuk do të qëndrojë gjatë në ‘Bay Arena’.

Sport Bild ka raportuar se te Leverkuseni e dinë se do ta kenë të vështirë ta mbajnë yllin kryesor të ekipit, megjithatë për ta shitur atë duan ta bëjnë me një çmim të madh.

Kampioni aktual i Bundesligës i ka bërë të qartë skuadrave të interesuara për Wirtz se lojtari nuk do të largohet pa u paguar shuma prej 150 milionë eurove, në mënyrë që ai të bëhet lojtari më i shtrenjtë në histori të futbollit gjerman.

Rekordin aktualisht e mbanë Ousmane Dembele që iu bashkua Barcelonës nga Dortmund për 135 milionë euro.

Tre gjigantët evropianë si Bayern Munich, Real Madrid dhe Manchester City e kanë bërë prioritet transferimin e gjermanit dhe madje pritet një luftë e madhe mes tyre në afatin kalimtar të janarit.

Wirtz po vazhdon me formën e shkëlqyer, ku këtë edicion në 22 ndeshje ka shënuar 10 gola dhe ka asistuar në pesë të tjerë. /Telegrafi/