Gjatë ditës së somte është hedhur shorti në selinë e UEFA-s në Nyon të Zvicrës, ku ekipet e moshave U17 dhe U19 të kombëtares së Shqipërisë kanë mësuar kundërshtarët.

Kombëtarja U-17 e di tashmë se me cilët kundërshtarë do të luajë për kualifikueset e raundit të parë për Kampionatin Evropian “Estoni 2026”.

Shorti i hedhur në selinë e UEFA-s e vendosi Shqipërinë në Grupin 8, së bashku me Kroacinë, Holandën dhe Kazakistanin.

Të gjitha ndeshjet e Grupit 8 të këtij mini-turneu do të luhen në Kroaci, në datat 11, 14 dhe 17 nëntor 2025. Vendet e para dhe të dyta të çdo grupi do të kualifikohen më tej në raundin e dytë të kualifikueseve.

Në anën tjetër, Shqipëria U-19 u shortua në këtë “Qualifiyng Round” grupin 5 së bashku me Ukrainën, Malin e Zi dhe Sllovakinë.

Edhe këtë herë, UEFA si edhe federatat pjesëmarrëse në këtë grup kanë vendosur t’ia besojnë FSHF-së organizimin e këtij mini-turneu që do të zhvillohet në muajin nëntor të vitit 2025.

Janë përcaktuar edhe datat e ndeshjeve, 12, 15 dhe 18 nëntor, ndërsa përballjet do të vendosen më vonë dhe do të bëhen me dije për opinionin publik.