Ish-deputeti i Lëvizjes Vetëvendosje, Haki Abazi sot zyrtarisht është anëtarësuar në Aleancën për Ardhmërinë e Kosovës.

Po ashtu, Abazi është edhe kandidat i AAK-së për deputet në zgjedhjet e 9 shkurtit 2025.

Kreu i AAK-së, Ramush Haradinaj në një konferencë për media i ka uruar Abazit mirëseardhje në partinë e tij.

“Kolegu Haki Abazi i takon këtyre njerëzve, në shumë etapa të rrugëtimit tonë e ka bërë pjesën e vet të çmuar. Ishte aktiv në çështje dhe procese të rëndësishme për vendin. Përvoja ime e bashkëpunimit me të në parlament ka qenë e mirë”, tha Haradinaj.

Nga ana e tij,  Abazi shprehu falënderime për mikpritjen dhe nënvizoi se integrimi në NATO mbetet prioriteti kryesor i Kosovës. Ai theksoi se AAK ka një vizion dhe plan të qartë për arritjen e këtij objektivi.

“Dua ta falënderoj këtë shtëpi të madhe që idenë e Skënderbeut me i ba thuprat bashkë për mos me u thy në këto situata shumë delikate të sigurisë në Ballkan, e kam gjetur vetëm të AAK-ja. Unë kam vendosur që të jem krahu i Haradinajt dhe miqve që janë këtu në këtë subjekt”, përfundoi Abazi./Arbresh.info