Përfaqësuesi i Special i Gjermanisë për Ballkanin Perëndimor, Manuel Sarrazin, sot po qëndron për vizitë zyrtare në Prishtinë.

Kryetari i Partisë Demokratike të Kosovës (PDK), Memli Krasniqi, përmes një postimi në rrjetin social “Facebook”, ka njoftuar se është takuar me Sarrazin.

Në takim, Krasniqi ka informuar Sarrazin për angazhimin e PDK-së në ruajtjen e interesave të Kosovës dhe ka diskutuar për zhvillimet e fundit politike në rajon, me një fokus të veçantë në Kosovë.

Krasniqi theksoi rëndësinë e bashkëpunimit të ngushtë me partnerët ndërkombëtarë për zhvillimin dhe integrimin euro-atlantik të Kosovës.

Postimi i plotë:

Bashkë me Bedriun dhe Vlorën, në selinë e PDK-së, e pritëm Përfaqësuesin Special të Gjermanisë për Ballkanin Perëndimor, Manuel Sarrazin. Bashkë diskutuam për zhvillimet e fundit politike në rajon, me theks të veçantë ato në Kosovë.

Emisarin Sarrazin e njoftova se Partia Demokratike e Kosovës është angazhuar çdo ditë, në të gjitha nivelet e vendimmarrjes, të jap kontributin e saj të parezervë për ruajtjen e interesit të shtetit tonë.

Për PDK-në, bashkëpunimi i mirë me partnerët ndërkombëtarë në funksion të zhvillimit dhe integrimit euro-atlantik të Kosovës është tejet i rëndësishëm.

Në këtë drejtim, PDK mbështetë të gjitha nismat e mirëfillta të cilat rrisin dhe fuqizojnë bashkëpunimin konstruktiv rajonal – si hap konkret drejt përafrimit të rajonit me Bashkimin Evropian.

Emisarin Sarrazin e falënderova për kontributin e vazhdueshëm të Gjermanisë për Kosovën!/Arbresh.info