Ministri i Financave, Punës dhe Transfereve, Hekuran Murati, ka reaguar pas publikimit të shpenzimeve të Qeverisë Kurti për udhëtime jashtë vendit.

Me anë të një postimi në Facebook, Murati ka kritikuar mediat duke i quajtuar ato “media qepuese” dhe duke thënë se po dezinformojnë me lajme të rreme.

“Tema e sotme e mediave qepuese qenka dezinformimi me lajme të rreme për shpenzimet për udhëtime jashtë vendit.  Për të njëjtën temë, dhe pikërisht për të njëjtën arsye – plasim i rrenës – mu desh t’i reagoja ditë më parë edhe deputetit Haradinaj”, shkroi ai.

Tutje, ai ka paraqitur grafikat e shpenzimeve për udhëtime zyrtare jashtë vendit, teksa ka thënë se ato me dërgimin e Forcës së Sigurisë dhe Mbrojtjes në trajnime jashtë.

“Në foton e parë e keni nivelin e shpenzimeve për udhëtime zyrtare jashtë vendit, për të gjitha institucionet – Qeveria, Komunat, Kuvendi, institucionet e pavarura etj.  Në foton e dytë e keni nivelin e shpenzimeve vetëm për Qeverinë. E ku rritja kryesore vjen si rezultat i dërgimit në trajnime të forcave të sigurisë e mbrojtjes”, shkroi tutje Murati./Arbresh.info/