“Festo me zemër jo me armë”, policia sekuestron 11 armë dhe municione gjatë muajit korrik

14:27 | 22 Korrik 2024
E.G

Policia e Kosovës (PK) vetëm gjatë 24 orëve të fundit ka reaguar në dy raste të ndryshme ku ka pasur të shtëna festive dhe ka sekuestruar 20 gëzhoja.

Ndërkaq, gjatë muajit korrik të këtij viti ka reaguar në 13 raste, të gjitha në ahengje, si dhe ka sekuestruar 11 armë dhe municione të llojeve dhe kalibrave të ndryshëm, shkruan Arbresh.info.

“Posedimi dhe përdorimi i armëve në përgjithësi e në veçanti në festa dhe ahengje, është i ndaluar dhe sanksionohet me ligj, andaj festoni me zemër e jo me armë, mos e shndërroni gëzimin në hidhërim dhe tragjedi.”, thuhet në njoftim.

“Policia apelon tek qytetarët që të bëjnë kujdes për sigurinë e tyre dhe të tjerëve, me theks të veçantë në ceremoni festive ku ka prezencë të madhe të njerëzve, vazhdoni të bashkëpunoni me Policinë e Kosovës në interes të sigurisë për të gjithë.”, thuhet tutje./Arbresh.info/